In nossa rait „gesund im Engadin“ / „saun in Engiadina“ colliains terapeutas e terapeuts cun üna scolaziun i’l champ da terapias cumplessivas ed alternativas in nossa regiun. Uschè preschantains nos savair e nossas spüertas ad ün vast public.
Daspö 2010 colliains nus sün nossa plattafuorma «saun in Engiadina» terapeutas e terapeuts cun üna scolaziun i’l champ da terapias cumplessivas ed alternativas in nossa regiun. Uschè preschantains nos savair e nossas spüertas ad ün vast public.
Il sustegn vicendaivel, il barat dad experienzas e la collavuraziun üna cull’otra sun per nus evidaints. Nus vulains sustgnair cliaints e paciaintas in lur tschercha da trattamaints e chüras cunter malatias ed a’ls güder d’amegldrer e mantgnair üna buna sandet fin ill’ota eted.
Nossa plattafuorma vuless infurmer a nossa cliantella e paciaints sur da las spüertas preventivas e möds da trattamaints e chüras cumplementeras ed alternativas in nossa regiun. Nus vulains musser sü ün spectrum vast per ün prevedimaint da sandet optimel.
Terapeutas/terapeuts, cussgliedras/cussglieders e cliaintas/cliaints as paun cò infurmer sur da la spüerta da trattamaints cumplessivs e sur da referats, seminars e workshops in nossa regiun.
Nus partenarias e partenaris da la rait ans chattains regulermaing pel barat dad infurmaziuns ed experienzas e per imprender a cugnuoscher vicendaivelmaing las spüertas terapeuticas. Uschè s-chaffins ed ütilisains sinergias e rinforzains e consolidains la posiziun e la preschentscha da las spüertas complementeras ed alternativas in nossa regiun.
Nossa visiun resta, dad unir e trer a nüz tuot las forzas, il savair, il potenziel, la sabgientscha e l’avertezza pel bainesser da nossa cliantella e da nossas paciaintas e noss paciaints. Nus vulains a’ns accumpagner e sustgnair vicendaivelmaing in dierecziun dad üna vita sauna ed allegraivla in consonanza cun nos ambiaint.